“Palmali Holding” Birinci Qarabağ müharibəsində şəhid olmuş Əlisuvar Məmmədovun adını daşıyan gəminin suya endirilməsi mərasimini keçirməklə 2022-ci ilə yekun vurdu.
Şamaxı TV xəbər verir ki, bununla da “Palmali” donanması şəhidimizin adını daşıyan növbəti gəmi ilə dünya sularında sayını çoxaltmış oldu. Şəhidimizin yaxınları gəmini görmək və yola salmaq üçün Türkiyəyə dəvət olundu. Şəhidin ailə üzvləri Tuzlanın Dentaş tərsanəsində dənizə buraxılan gəmini yola salarkən göz yaşlarını saxlaya bilmədilər. Şəhidin həyat yoldaşı Pərvanə xanım Mübariz Mənsimova təşəkkür edərək, bu gəmi ilə ona yenidən həyat bəxş edildiyini söylədi.
Mübariz Mənsimov, öz növbəsində, hər bir azərbaycanlının şəhidlərimizin adının yaşatmağa borclu olduğunu vurğuladı:
“Onlar biz başımız uca gəzək deyə torpaqlarımız uğrunda şəhid oldu. Biz də, öz növbəmizdə qəhrəmanlarımızı tanıdıb onları adlarını hər zaman uca tutmalıyıq”.
Qeyd edək ki, baş leytenant Əlisuvar Əliheydər oğlu Məmmədov 10 mart 1957-ci ildə Şamaxı Rayonunun Dağ Göylər kəndində anadan olub. Ağdərə-Laçın istiqamətində gedən döyüşlərdə qəhrəmanlıq göstərib və düşmən mövqeylərini bir neçə dəfə məhv edərək, onları geri cekilməyə məcbur etmişdi. 1992-ci il 9 oktyabr tarixində Laçın rayonunun Pircahan kəndi yaxınlığında gedən döyüşlərdə qəhrəmancasına şəhid olmuşdur.
Hələ bu ilin əvvəlində “Palmali” şirkətlər qrupunun prezidenti, azərbaycanlı iş adamı Mübariz Mənsimov bəyan etmişdi ki, “Palmali” donanmasına daxil olan bütün gəmilərə şəhidlərin adları veriləcək. Bu təşəbbüsün həyata keçirilməsi nəticəsində 2022-ci ildə “Palmali” donanması dəniz sularına 9 (doqquz) yeni gəmi yola salıb ki, bunların hamısı Vətən müharibəsi şəhidlərinin adlarını daşıyır: Azərbaycanın Milli Qəhrəmanı Polad Həşimov, şəhidlər Adil İbrahimli, Mətin Hüseynov, Pəncəli Teymurov, Xudayar Yusifzadə, İman və Bəhram Məmmədzadələr qardaşları, Malik Əliyev, Əli Nəcəfov, Cəbrayıl Dövlətzadə.
Bundan əlavə daha, 2023-cü ildə də “Palmali” donanmasına daxil olacaq yeni gəmilərə şəhidlərin adları veriləcək. Bunlar “Sabuhi Ahmadov”, “Vusal Maharramov”, “Babak Mahmudlu”, “Mukhtar Gasımlı”, “Royad Mammadov”, “Karabakh Heroes”, yəni “Qarabağ qəhrəmanları” gəmiləri olacaq.
